A formación foi dirixida pola vogal do Consello Regulador e enóloga Sonia Otero xunto con Alberto Rodríguez, presidente da Asociación de Repostería Tradicional de Melide
Un total de 18 alumnos e 3 profesores de 1º curso de Dirección de Servizos do CIFP Paseo As Pontes, na Coruña, xa coñecen os matices diferenciadores dos produtos 100% galegos, que ampara o Consello Regulador dos Augardentes e licores Tradicionais de Galicia.
A actividade contou coa dirección de Sonia Otero, vogal do Consello Regulador e enóloga. Estivo acompañada por Alberto Rodríguez, presidente da Asociación de Repostería Tradicional de Melide.
A sesión dividiuse nunha parte teórica e outra práctica. A primeira consistiu nun repaso polas características dos destilados. Así, recalcouse a importancia da boa etiquetaxe que certifique que os produtos teñen orixe galega. Tamén se mencionaron as principais funcións do Consello Regulador e os produtos amparados baixo as catro Indicacións Xeográficas ( IG): IG Bagazo de Galicia, IG Augardente de Herbas de Galicia, IG Licor de Herbas de Galicia e IG Licor Café de Galicia.
O alumnado e os profesores puideron distinguir os matices dos augardentes dependendo da variedade de uva que se utilice na súa elaboración. Tamén dentro desta mesma Indicación Xeográfica atópase o Augardente de Galicia Envellecido, que “se distingue dos anteriores pola permanencia mínima dun ano en envases de madeira”, explicou Otero. Precisamente este último foi o produto que máis sorprendeu; mentres o Licor Café de Galicia e o Licor de Herbas de Galicia, foron os destilados que máis gustaron.
Para terminar, os participantes penetráronse na repostería tradicional de Melide con Alberto Rodríguez, presidente da Asociación de Repostería Tradicional de Melide. Así, realizáronse varias maridaxes: Augardente de Galicia Envellecida co almendrado, Augardente de Herbas de Galicia co melindre e Licor Café de Galicia co rico (elaborado con fariña, ovos e manteiga cocida de vaca). Tamén se degustaron outras creacións como babá de Augardente de Galicia Envellecida e un crumble de rico e melindre con crema inglesa. Máis exemplos de como combinar os destilados galegos na repostería.
