O estudantado de Xeografía e Historia examinou o innovador sistema de reutilización de augas do edificio tecnolóxico e a perfecta harmonía entre a zona empresarial e o paseo do río Muíños
O obxectivo desta excursión a Nigrán era coñecer de preto o innovador modelo de sostibilidade ambiental que se leva a cabo neste parque. O xantar foi en Praia América para apreciar, de paso, o modelo de protección dunar da zona
O Concello de Nigrán recibíu esta mañá a visita de 108 alumnos da facultade de Xeografía e Historia da Universidade de Santiago nunha excursión organizada para ver de preto o parque empresarial de Porto do Molle. En concreto, os estudantes de 1º de Historia da Arte, 2º de Sistema de Información Xeográfica e 3º de Xeografía Urbana, tiveron a oportunidade de coñecer in-situ grazas aos técnicos da concesionaria Aqualia o sistema de reutilización de augas residuais do edificio tecnolóxico de Porto do Molle, pioneiro en España e prácticamente único en Europa. Ademais, realizaron unha visita guiada pola marxe do río Muíños ata chegar ao muíño do século XVIII ubicado ao seu carón e, posteriormente, coñeceron a zona de naves e as obras do futuro centro comercial Nasas.
O obxectivo desta visita a Nigrán foi apreciar o innovador modelo de sostibilidade ambiental que se leva a cabo aquí, onde conviven harmoniosamente natureza e empresas punteiras tecnolóxicas, incidindo no modelo urbao elixido para o crecemento do parque.
“É un orgullo que alumnado dunha universidade veña a coñecer o noso Parque Empresarial con este obxectivo porque significa que, efectivamente, somos unha referencia en termos de sostibilidade ambiental, deseño urbano e modernidade”, recoñece o alcalde, Juan González.
Co fin de aproveitar ao máximo a saída, previamente estiveron en Vigo estudando o traballo da Comunidade de Montes de Cabral e os petróglifos da comarca e ao mediodía comeron en Praia América para apreciar a protección dunar desenvolvida polo Concello. Xa pola tarde visitaron Baiona para ver o entramado medieval do Casco Vello.
