• Solicita unha maior coordinación para cubrir baixas de facultativos adscritos a este consultorio que motivan graves perxuizos para os pacientes que precisan ser atendidos
O alcalde de Cerdedo-Cotobade, Jorge Cubela, trasladoulle a responsables do Sergas a súa preocupación e a da veciñanza pola ausencia periódica de atención médica no Centro de Saúde de Cerdedo motivada pola falla de coordinación para cubrir axeitadamente a non presenza do persoal facultativo neste consultorio sanitario.
Cubela manifestoulle aos responsables do Sergas a necesidade de habilitar mecanismos que garantan a atención médica aos veciños e veciñas de Cerdedo que se ven inmersos nunha situación incómoda e moitas veces sobrevida e que impiden que teñan unha atención sanitaria eficiente como corresponde.
O rexedor de Cerdedo-Cotobade dixo entender que se poidan producir situacións imprevistas ou que os facultativos teñan que dispor de días propios para atender as súas obrigas, dispor de horas sindicais (como é o caso do médico de Cerdedo), baixas por enfermidade, permisos ou mesmo vacacións, pero “o que non pode ser é que se produzcan casos nos que hai persoas citadas e non haxa médico que as atenda e que a solución sexa
que se trasladen a outro centro sanitario máis cercano. A esa improvisación haille que por remedio inmediato porque os que saen perxudicados son os cidadáns, alleos a calquera responsabilidade sobre este tema”.