O Departamento de Servizos Sociais, que dirixe Amalia Goldar, manterá aberto dende o 15 de xuño ata o vindeiro 8 de xullo o prazo para inscribirse na segunda quenda das actividades para maiores ofertadas polo Concello da Estrada, que se desenvolverán entre os meses de setembro do 2022 e xaneiro do 2023.
En total hai dispoñibles 95 prazas no eido urbano repartidas do seguinte xeito: 11 delas para o taller de memoria; 39 para pilates; e 45 para a actividade de xerontoximnasia.
Estas actividades impartiranse no Novo Mercado.
Para poder participar nas actividades para maiores, o/a interesado/a deberá estar empadroado/a no Concello da Estrada e ter máis de 50 anos. Para aquelas persoas con máis dun 33% de discapacidade non haberá idade mínima. Aquelas persoas que desexen anotarse, poderán presentar a súa solicitude no Departamento de Servizos Sociais, en horario de 9.00 a 14.00 horas, ou a través da sede electrónica do Concello da Estrada.
Tanto as persoas que xa participaran na primeira quenda (de febreiro a xuño) como as que se inscriban agora para a segunda, terán de prazo para realizar o pago ata o vindeiro día 9 de setembro.
