A semana pasada membros do BNG local reuníronse coa Dirección do IES O Carril para coñecer de primeira man a problemática que se presentaría o vindeiro curso académico de prosperar a intención da consellería de Educación de non autorizar a impartición da Vía de Música e Artes Escénicas, dentro da modalidade de Bacharelato de Artes, que se oferta no IES O Carril.
Cabe dicir que esta vía, da que o IES O Carril foi precursor en toda a área do Salnés-Barbanza, vén de ser recuperada para as ensinanzas de Bacharelato pola LOMLOE. Materias propias desta vía – malia ter sido eliminada na anterior lei de educación, LOMCE- foron impartidas no centro ao longo destes últimos anos, de xeito continuado, como materias optativas.
Non se entende, en consecuencia, que se poñan obstáculos a un centro que conta co profesorado, experiencia, horarios e unha enorme demanda dese itinerario dentro do Bacharelato Artístico, propiciada pola tradición musical de Vilagarcía e toda a súa área de influencia: conservatorios, escolas de música, grupos de música e danza tradicionais, corais, etc.
E por iso, o BNG, por medio do seu voceiro Xosé Lois Leirós Gude, someterá á aprobación do Pleno do concello unha moción no sentido de instar á Consellería de Educación a que autorice a impartición da Vía de Música e Artes Escénicas no IES O Carril no curso 2022-23 e posteriores.