O concello finaliza a humanización da rua cabadiña en Arcade

Instaláronse máis de 250 metros cadrados de beirarrúa e mellorouse a capa de rodadura e a iluminación pública
O Concello de Soutomaior acaba de finalizar os traballos de humanización na rúa Cabadiña de Arcade. Unha mellora coa que o goberno local quere mellorar a seguridade viaria das decenas de veciños que residen nesta rúa e dos centos de usuarios que utilizan esta vía para acceder ao centro de Arcade. Os traballos contaron cun orzamento de 39.000 euros.
Así, os traballos centráronse inicialmente en instalar un total de 256 metros cadrados de nova beirarrúa substituíndo aos tramos descontinuos que había ata o momento, e que supoñían unha molestia de accesibilidade aos veciños con mobilidade reducida ao non contar con pasos de peóns a nivel.
Do mesmo xeito, mellorouse a iluminación pública coa instalación de 9 novos farois de tecnoloxía LED de baixo consumo. Por último, completouse a renovación da capa de rodadura coa aplicación de novo asfalto, o pintado de todas as marcas viarias e a instalación de dous redutores de velocidade como parte do plan de mellora de seguridade viaria municipal.
O alcalde de Soutomaior, Agustín Reguera, destacou que os traballos de humanización “permitirán que os veciños poidan camiñar e pasear con total seguridade e accesibilidade. Moitos acceden por esta vía ao parque canino coas súas mascotas e pola seguridade de todos é necesario que conten cunha plataforma separada do tráfico”, finalizou o rexedor.