O Fondo Galego de Cooperación financiou con 10.000 euros a construción dun pozo na incomunicada illa de Pecixe en colaboración coa Rexión de Cacheu
Máis de 250 familias da comunidade de Cassaca, en Guinea-Bissau, dispoñen de acceso á auga potable tras a construción dun pozo e dúas fontes a través dun proxecto financiado polo Fondo Galego de Cooperación e Solidariedade, co goberno rexional de Cacheu como parceiro en terreo. A asociación de concellos e deputacións destinou 10.015 euros a esta actuación, que beneficiará aos 3.207 habitantes da illa de Pecixe, onde a poboación vive na extrema pobreza e practicamente illada, dada a falta de comunicacións co continente, polo que carece dos servizos máis básicos.
A infraestrutura, que conta cun depósito de 4.000 litros e unha motobomba alimentada por paneis solares, suporá unha mellora especialmente para as mulleres e nenas, que investían tempo e esforzo en ir buscar auga ao único reservorio natural que existía en Cassaca. Ademais, gran parte dos problemas de saúde da comunidade están vinculados á insalubridade da auga e aos baixos niveis de hixiene derivados da súa escaseza. Do mesmo xeito, agora minguarán os conflitos con animais domésticos e salvaxes que beben tamén da lagoa, evitando o risco que supuña para as persoas e facilitando a sustentabilidade da fauna e flora da zona.
As obras complementáronse con análises para comprobar a calidade da auga e mais accións para sensibilizar sobre hábitos hixiénicos e sobre o correcto emprego deste recurso. Destaca a implicación da poboación local en todo o proceso, mesmo colaborando para suplir as dificultades no transporte de persoal e materiais, especialmente na época de chuvias. De feito, o Comité de Desenvolvimento Local acompañou a execución das distintas actividades e facilitou toda a información necesaria ao equipo do proxecto, ao cal tamén deron seguimento os consellos consultivos da sociedade civil e as incipientes estruturas de goberno local. Por último, elaborouse de maneira conxunta un plan de xestión do pozo e creouse un comité para levalo á práctica, de maneira que se garante a sustentabilidade da iniciativa.
A auga está recoñecida como dereito humano, de xeito que “toda persoa ten dereito a dispoñer de auga suficiente, salubre, aceptable, accesible e asequible para o uso persoal e doméstico”. Ademais, a Axenda 2030 recolle como ODS 6 “garantir a dispoñibilidade de auga e a súa xestión sustentable e o saneamento para toda a poboación”.
O Fondo Galego
O Fondo Galego de Cooperación e Solidariedade está integrado por 100 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur Global e a sensibilización da sociedade galega a prol da solidariedade internacional. Recoñecido como axencia municipal da cooperación galega, o Fondo Galego chega ao seu 25 aniversario tendo desenvolvido máis de 170 proxectos en 32 países e promovendo numerosas actividades e materiais en relación aos desequilibrios Norte-Sur e a Axenda 2030.
