Valora a importancia de que “días despois do éxito acadado polos pilotos galegos de motocrós Jorge Prado e Rubén Fernández en Indonesia, uns 30 nenos e nenas que soñan con chegar tan alto como os seus ídolos se suban a unha moto en Forcarei para ser campións de España”
O secretario xeral para o Deporte, José Ramón Lete Lasa, participou esta mañá no Circuíto da Madalena na presentación do Campionato de España de Supermoto que se celebrará esta fin de semana e que reunirá preto de 80 pilotos de toda a península, así como de Francia, Italia ou Brasil.
O mandatario galego destacou o feito de que “días despois do éxito acadado polos pilotos galegos de motocrós Jorge Prado e Rubén Fernández en Indonesia, uns 30 nenos e nenas que soñan con chegar tan alto como os seus ídolos se suban a unha moto en Forcarei para ser campións de España”. Dos 80 pilotos participantes, ao redor de medio centenar de máis de 15 anos participarán nas dúas categorías de adulto (terra e asfalto) e 30 rapaces e rapazas de 6 a 14 anos participarán noutras dúas categorías infantís.
Lete Lasa destacou o “incrible nivel do motociclismo de Galicia, con galegos e galegas triunfando por todo o planeta”, unha situación que é extensible a todos os deportes de motor, nos que Galicia tamén organiza algúns dos mellores eventos do mundo.
Mañá venres terán lugar os adestramentos libres, o sábado será xa a actividade oficial cos adestramentos cronometrados polo serán, e o domingo terán lugar as carreiras a partir das 10 da mañá. A Xunta de Galicia colabora co Moto Club VFM, patrocinador principal, na organización e financiamento do Campionato de España de Supermoto.