• O investimento nos rondou os 10.000 euros
O Concello de Cerdido vén de realizar varias tarefas de mantemento e pintar varias aulas e estancias do centro de ensinanza do municipio, o C.E.I.P. A Barqueira.
A execución consistiu na renovación e pintura da entrada ao recinto, varios pasillos e aulas, así como tamén substitución do solo en varias estancias colocando tarima flotante. Ademais, tamén se levaron a cabo diversas tarefas de mantemento e limpeza na instalación.
A execución, entre os traballos de pintura e carpintería, supuxo un investimento de arredor de 10.000 euros para as arcas municipais.
Así mesmo, na visita que realizou o xefe territorial de Educación da Xunta de Galicia, Indalecio Cabana, ao centro de ensinanza durante o mes de agosto, comprometeuse a pintar a fachada do edificio, reformar e renovar o patio interior do colexio e os aseos do mesmo antes do remate de 2022.
O rexedor local Benigno Galego, quixo destacar que “estas obras redundan no beneficio do alumnado do C.E.I.P. A Barqueira, adecuando as súas instalacións, co fin de que podan estudar nas mellores condicións posibles”
“Desde o noso equipo de goberno apostamos por investir na educación da nosa veciñanza, facilitando na medida do posible a súa formación de cara ao futuro” engadiu Galego.
“No caso de que a delegada territorial cumpra a súa palabra, a comezos do vindeiro 2023, teremos unhas instalacións melloradas e actualizadas a estos tempos, que sen dúbida repercutirán nunha boa educación para as crianzas do municipio” concluíu o alcalde.
