― A meirande parte destes postos atinxiron a diversas categorías de persoal sanitario non facultativo, a maior parte para persoal de Enfermaría e técnico en coidados auxiliares de enfermaría
― No tocante a persoal non sanitario, a oferta concentrouse nas categorías de grupo auxiliar da función administrativa e de celador
― A incorporación administrativa aos novos destinos tras o procedemento de mobilidade interna voluntaria realizaráse o vindeiro 1 de novembro en todos e cada un dos servizos e unidades do Complexo Hospitalario Universitario pontevedrés
A Área Sanitaria de Pontevedra e O Salnés -a través das xestións da súa comisión de mobilidade interna voluntaria- está a rematar o procedemento administrativo de mobilidade interna voluntaria no Complexo Hospitalario Universitario de Pontevedra , mediante o cal se ofertaron máis de 700 postos de traballo de distintas categorías profesionais.
A meirande parte destes postos atinxiron a diversas categorías de persoal sanitario non facultativo, a maior parte para persoal de Enfermaría e técnico en coidados auxiliares de enfermaría. No tocante a persoal non sanitario, a oferta de mobilidade interna voluntaria concentrouse nas categorías de grupo auxiliar da función administrativa e de celador.
A través deste proceso, os profesionais teñen a oportunidade de optar, con base no baremo de méritos establecido, ás unidades/servizos do Complexo Hospitalario Universitario de Pontevedra que máis se adecúan ás súas preferencias. Dito baremo deste procedemento de mobilidade interna valora coma méritos a propia experiencia profesional do persoal aspirante, así coma a súa formación.
Desde a comisión de mobilidade interna voluntaria do Complexo Hospitalario Universitario pontevedrés sinalan que, por primeira vez na Área Sanitaria de Pontevedra e O Salnés, levouse a cabo tanto a solicitude de participación no mesmo coma a baremación correspondente de xeito telemático, a través do programa FIDES, co cal foron arquivados, actualizados e validados todos os currículos profesionais presentados de xeito electrónico.
Incorporación administrativa o vindeiro 1 de novembro
A incorporación administrativa aos novos destinos tras o procedemento de mobilidade interna voluntaria realizaráse o vindeiro 1 de novembro en todos e cada un dos servizos e unidades do Complexo Hospitalario Universitario pontevedrés.
