• O alcalde destacou o papel da Benemérita desde o punto de vista da seguridade cidadá e a súa gran vocación de servizo
Como todos os anos o alcalde Jorge Cubela estivo presente nos actos conmemorativos do Día do Pilar durante os cales se homenaxeou aos gardas civís que prestan os seus servizos no posto de CerdedoCotobade desde onde cubren as necesidades en materia de seguridade cidadá en todo o municipio.
Os actos, que tiveron lugar na igrexa parroquial de San Xoán de Cerdedo, contaron coa presenza de varios membros do equipo de goberno, o director xeral de Gandeiría, Agricultura e Industrias Alimentarias, José Balseiros, o cura párroco Luis Cagiao e máis de 150 veciños e veciñas do municipio.
Ao remate da misa solemne oficiada polo párroco Luis Cagiao as autoridades e veciños de Cerdedo-Cotobade felicitaron aos gardas por este día e agradeceron os servizos prestados á veciñanza ao longo do tempo en que levan posicionado o cuartel da Garda Civil. Cubela salientou a gran vocación das persoas que visten o uniforme da Benemérita e puxo en valor “o traballo e o bo facer polo que se distinguiu sempre tanto o comandante do posto como os números que prestan o seu servizo no cuartel de Cerdedo-Cotobade”.
Ademais salientou o enorme grao de colaboración existente entre o Concello e a Garda Civil e os magníficos resultados que en materia de seguridade cidadá e protección aos veciños se estaba a dar nesta demarcación que protexe e administra o cuartel de Cerdedo-Cotobade.
