O Concello de Pontecesures vén de instalar un novo contedor para a recollida selectiva de papel na rúa Estación. Diante das demandas realizadas polos veciños e veciñas da zona, o Concello solicitoulle a FCC, empresa adxudicataria do servizo de recollida de lixo da Mancomunidade Serra do Barbanza, un novo depósito para facer fronte ás necesidades da veciñanza da rúa Estación.
Dende o Concello de Pontecesures agardan que a colocación deste novo contedor permita normalizar o servizo de recollida na zona e insta á veciñanza a non depositar o lixo fora dos espazos habilitados para elo, como estaba a acontecer nas últimas semanas. Neste sentido, lembran que o municipio dispón dunha Ordenanza Reguladora da Limpeza Viaria e Ornato Público que contempla sancións tanto para aquelas persoas que tiren os residuos fora dos colectores ou os guinden en depósitos que non se correspondan co residuo depositado, como para os que abandonen mobles ou residuos en lugares non habilitados. Unhas sancións que poden supoñer a imposición de multas de ata 750 euros, nos primeiros casos, ou de ata 1.500 euros, nos casos máis graves.
Así mesmo, o Concello de Pontecesures lembra que os terceiros martes de cada mes está programada a recollida selectiva de aparellos electrónicos e informáticos, así como dos escombros de pequenas obras domésticas. Dous servizos aos que a veciñanza pode acceder simplemente chamando ás oficinas municipais (986 557 125), en horario de 9:00 a 14:00 horas, indicando nome, enderezo e teléfono de contacto. Ademais, o Concello tamén ofrece un servizo de recollida de enseres (mobles, colchóns…). Para solicitalo, só é preciso chamar ao teléfono 639 107 638 para fixar unha data para a recollida.
