• Luis López agradece o traballo fundamental de José Antonio Lorenzo ao longo destes anos, que permitiu a transformación e a posta en valor do concello.
Marisa Domínguez Álvarez será a candidata do Partido Popular á alcaldía de Mondariz-Balneario nas eleccións municipais de maio. Tomará así o relevo de José Antonio Lorenzo, alcalde con dez maiorías absolutas, e que dá un paso ao lado co “agradecemento eterno” do seu partido polo “traballo ben feito, por toda unha vida dedicada en pleno a mellorar a calidade de vida e o benestar dos seus veciños, e por ter conseguido a transformación e a posta en valor do seu concello”, subliña o presidente provincial, Luis López, que xunto coa secretaria xeral, Luisa Piñeiro, mantiveron unha reunión co alcalde e coa candidata.
A Marisa Domínguez, López agradeceu “a valentía e a ilusión” coa que asume o reto. “Non será fácil substituír a un gran alcalde como José Antonio, pero Marisa está preparada, ten os coñecementos, experiencia en xestión e o compromiso firme para seguir avanzando no desenvolvemento de Mondariz-Balneario”.
A candidata é empresaria, ten 50 anos e é veciña de Mondariz-Balneario. Diplomada en Relacións Laborais, esta é a súa primeira incursión en política. Di que asume o reto “con ilusión” e comprométese a “traballar duro” para dar continuidade a un proxecto que busca a mellora continua do seu concello. Nesta liña, agradece a confianza do Partido Popular e do alcalde, José Antonio Lorenzo. “Son unha persoa emprendedora, traballadora, positiva, e o meu compromiso con Mondariz-Balneario e co PP é total. Presentaremos o mellor equipo e o mellor proxecto para que o noso concello continúe sendo un concello referente en Galicia e no resto de España, e con servizos de calidade para os nosos veciños”.
