Este programa, impulsado polo CIM da Lama, está dirixido ao alumnado do colexio e conta coa colaboración económica da Deputación de Pontevedra
O Concello da Lama, a través do Centro de Información á Muller (CIM), levará a cabo un programa de actividades para o fomento da igualdade de oportunidades e a prevención da violencia de xénero, que conta cunha axuda económica da Deputación, e que contempla un acto aberto ao público o 25-N no Salón de Plenos do Concello no que tamén se gardará un miniuto de silencio en memoria das mulleres asasinadas no transcurso do ano 2022.
O programa posto en marcha polo Concello a través do CIM ten un orzamento global de 10.980 euros e conta cunha achega de 5.318,12 euros do ente provincial o que permitirá celebrar catro obradoiros centrados na prevención da violencia de xénero e no fomento da igualdade de oportunidades.
Os obradoiros que conforman este programa, impartidos por persoal especializado en materia de igualdade, están dirixidos exclusivamente ao alumnado de primaria do CEIP A Lama.
PLAN MADRUGA, PARA FACILITAR A CONCILIACIÓN FAMILIAR
Ao abeiro deste programa tamén se desenvolverá durante o período das vacacións de Nadal o ‘Programa Concilia’, un servizo que da apoio ás familias da Lama para facilitar a conciliación persoal, familiar e profesional, favorecendo así a corresponsabilidade. Este servizo está dirixido a nenos e nenas de 3 a 12 anos residentes no concello da Lama.
Cómpre lembrar que no mes de setembro o Concello da Lama puxo en marcha o “Plan Madruga” no CEIP da Lama, que conta tamén coa colaboración económica da Deputación, co obxectivo facilitar a conciliación e de ofrecer un espazo cómodo e seguro, no que os nenos e nenas poden realizar distintas actividades baixo supervisión antes do horario lectivo do centro escolar.