• A concelleira de Benestar Social e Mocidade, Rosa Fernández (PSdeG-PSOE), lembra que a actividade é gratuíta
• A pasada semana tivo lugar o obradoiro de tapices, que resultou un éxito de participación
O programa ‘Cóllelle o gusto’, organizado pola Concellería de Benestar Social e Mocidade, concluirá o vindeiro mes de decembro cunha última actividade. Logo dos talleres sobre iniciación á cestería, que tivo lugar a finais de outubro, e de deseño de tapices, desenvolto o pasado venres 18 de novembro, o ciclo pecharase cunha sesión sobre ‘babyshoes’, que consiste na elaboración de calzado para bebés. A concelleira responsable deste departamento, a socialista Rosa Fernández, explica que aínda hai prazas dispoñibles e que a cita será o venres día 2, na Casa Rosada, en horario de 17.00 a 21.00 horas. A inscrición é gratuíta, con materiais incluídos, e pode realizarse en persoa ou chamando ao 986872401, ademais de enviando un correo electrónico a xuventude@concellopoio.org.
Fernández fai un balanzo moi positivo de ‘Cóllelle o gusto’ e pon como exemplo a gran participación coa que contou o obradoiro de tapices. Persoas de diferentes idades tomaron parte nesta actividade, na que se elaboraron deseños moi chamativos con fíos, las e outras fibras. “Foi unha xornada de convivencia, toda vez que un dos grandes obxectivos que perseguimos con esta programación é ofrecer actividades para estreitar vínculos ao tempo que se aprenden diferentes manualidades”, finaliza Rosa Fernández.
