Será ás 12:00 horas no Auditorio Municipal con entrada de balde.
Adicionalmente, o Concello abre o formulario web de inscrición para o obradoiro de primeira infancia o sábado 17 de decembro
O Concello de Nigrán ofrece este domingo 4 de decembro ás 12:00 horas no Auditorio Municipal o concerto de música tradicional de ‘De Tapas’ a cargo da Fundación Igualarte. A entrada é de balde ata completarse o aforo. A formación, composta por 6 músicos, ofrece un repertorio baseado na música tradicional galega, aínda que engaden outras sonoridades e cores musicais, ademais, ofrecen temas propios onde o proceso creativo é fundamental.
Igualmente, o Concello abre a inscrición para o obradoiro de experimentación e uso dos sentidos para primeira infancia o sábado 17 de decembro na Biblioteca Municipal de Nigrán. Este está dirixido a bebés de ata 2 anos (horario de 17:00 a 18:00) e crianzas de 3 a 5 anos (de 18:30 a 19:30). É só para empadroados e poderá participar só un dos titores, estando as prazas limitadas a 10 parellas (filla/a e titor/a). A inscrición debe realizarse no formulario web pendurado en www.nigran.es.
Estas actividades forman parte do convenio de 5.000 € do Concello de Nigrán coa Fundación Igualarte. O seguinte obradoiro é o de pasta de sal o 28 de novembro e o de cociña o 30 de novembro (ambos no CEIP Humberto Juanes de 17:30 horas a 19:00 para crianzas de 5 a 8 anos e de 19:00 a 20:30 para nenos e nenas de 9 a 12 anos) en quendas de 15/20 minutos segundo orde de chegada. Finalmente, para o obradoiro de primeira infancia (Biblioteca, 17 de decembro- bebés de ata 2 anos ás 17:00 e crianzas de 2 a 5 anos ás 18:30 horas) é imprescindible inscrición previa no formulario web que no mes de decembro se habilitará en www.nigran.es, estando destinado só a crianzas empadroadas.
A Fundación Igualarte, con sede en Vigo, loita pola integración das persoas con diversidade funcional no campo artístico e o desenvolvemento das súas competencias creativas e expresivas, sendo a única de España adicada ao desenvolvemento artístico destas persoas.
