O carboeiro de barba vermella reunirase esta tarde coa deputada de Lingua María Ortega no Pazo Provincial para desexar unhas felices festas a toda da provincia
O Apalpador, a tradicional figura do Nadal na Galiza, visitará este ano sete concellos da comarca do Salnés man da Deputación de Pontevedra grazas á octava edición do programa ‘Nadal en Galego’. Na maña de hoxe o personaxe tradicional estivo no centro infantil de Príncipe Felipe e pola tarde visitará o Pazo Provincial, onde será recibido ás 19 horas pola deputada María Ortega, responsable do departamento de Lingua, e dende onde desexará unhas boas festas a toda a provincia.
Ademais de hoxe en Pontevedra, o Apalpador estará no Salnés o día de Noiteboa, no Conello de Meis ás cinco da tarde. Despois, o 27 de decembro chegará ás 12 da mañá á Illa de Arousa, pasará ás cinco da tarde por Ribadumia e pechará a xornada ás 19.00 en Cambados. Ao día seguinte, mércores 28, estará en Sanxenxo ás cinco da tarde e ás sete en Meaño. Será o día 4 de xaneiro cando estará en Vilagarcía de Arousa ás 12.30 do mediodía. Os percorridos itinerantes do pasarrúas polos centros das vilas estarán marcados por cada un dos concellos.
Como cada ano, a dinamización da lingua, o respecto ao medio ambiente e os hábitos de alimentación saudable, entre outros, serán os valores que fomentará o Apalpador, xunto ao seu compañeiro acordeonista, Servando Barreiro, e o seu burro Río Lor, coas actuacións e os pasarrúas, levando a música, o baile e as anécdotas a todas as comarcas da provincia.
O programa ‘Nadal en Galego’ foi deseñado tamén para fomentar o coñecemento da tradición de Nadal propia da Galiza e para que as e os máis novos poidan familiarizarse co mítica figura galega e coñecer a súa historia. Na orixe, ‘O Apalpador’ representábase como un carboeiro de barba vermella que baixaba das montañas ás vilas para apalpar os bandullos das crianzas e comprobar se comeran suficiente durante o ano, deixando ao seu carón agasallos e castañas.
