Fixeron andando o tramo entre a Alameda e a Catedral entonando varias cancións a medida que completaban o percorrido
Un total de 106 veciños e veciñas pertencentes á Unidade Pastoral de Campo Lameiro, que dirixe o cura párroco Fermín Santiago Iglesias, desafiaron ás inclemencias do tempo e peregrinaron a Compostela, este venres 30 de decembro, para gañar o xubileo.
Saíron en dous autobuses desde a Praza do Concello, en Campo Lameiro, e chegaron á capital de Galicia onde se concentraron na Alameda para partir ata a Catedral. No tramo participaron varios nonaxenarios que desafiaron á choiva e aos seus problemas de mobilidade para chegar ata o sepulcro do Apóstolo. A expedición fixo o camiño cantando para animar o seu andar e afrontar con ledicia e fe o tramo a percorrer baixo unha incesante choiva e forte vento.
Os membros da expedición pasaron pola Porta Santa, visitaron a tumba do Apóstolo, estiveron na Hora Santa e na parroquia da Corticela onde o seu párroco ofreceulles unha completa explicación sobre as distintas etapas históricas e construtivas da Catedral, as peregrinacións e o fenómeno xacobeo que move millóns de persoas.
Os veciños e veciñas de Campo Lameiro ademais de visitar ao Apóstolo, rezaron na Capela da Corticela por todas as persoas enfermas, pola paz no mundo e por todas as familias do municipio.
ENCONTRO CO ARCEBISPO, XULIÁN BARRIO, E CO BISPO AUXILIAR
Durante a súa estancia en Compostela, os veciños e veciñas de Campo Lameiro estiveron co arcebispo Xulián Barrio e co bispo auxiliar Francisco José Prieto Fernández cos que puideron manter unha pequena charla e desexarlles un Feliz Aninovo.
Pola súa banda, o cura párroco da Unidade Pastoral de Campo Lameiro, Fermín Santiago Iglesias, cualificou a experiencia como moi positiva e sinalou que “os veciños e veciñas de Campo Lameiro son fieis á sua palabra e así, desafiando as inclemencias metereólixas e con gran valentía, fixeron a peregrinación desde a Alameda á Catedral nun ambiente de total alegría e esperanza como aqueles peregrinos que camiñan á tumba do Apóstolo Santiago pedindo e rogando con fe”, indicou o sacerdote.
