• O servizo dependente da área de Promoción Económica e Urbanismo, dirixida polo socialista Gregorio Agís, experimentou un notable crecemento en número de usuario e usuarias con respecto a 2021
• Agís tamén salienta que Poio rematou o ano cun 11,5% de taxa de desemprego, a máis baixa en 16 anos
Un dos departamentos que desenvolve un traballo moi importante no Concello, dentro da área de Promoción Económica e Urbanismo, é a Oficina de Orientación Laboral, que no ano 2022 viu incrementada a súa actividade de maneira notable. Máis de 1.300 persoas foron asesoradas a través desta oficina, tal e como sinala o concelleiro responsable da área, o socialista Gregorio Agís. Esta cantidade supón un importante aumento con respecto aos datos correspondentes ao exercicio anterior, cando se prestou servizo a aproximadamente 700 cidadáns. “Consolídase a tendencia á alza dos últimos anos, que xa viñamos detectando mesmo desde antes da pandemia”, apunta o edil do Goberno municipal, que incide en que, se ben a meirande parte das persoas que acoden ás instalacións, situadas no Centro de Formación da Reiboa (A Seca), “tamén existe unha importante demanda por parte de veciños e veciñas doutros concellos da bisbarra e da contorna”.
A busca activa de emprego é unha das cuestións protagonistas no asesoramento que se realiza a través da Oficina de Orientación Laboral, se ben desde a Concellería de Promoción Económica e Urbanismo tamén se salienta o feito de que cada vez son máis as persoas interesadas en mellorar ou potenciar habilidades e recursos de cara ao emprendemento. O horario de atención é de 9.00 a 13.30 horas. Tamén é posible contactar a través do 986770001 (extensión 1502) ou no mail orientacionlaboral@concellopoio.gal.
A menor porcentaxe de paro en 16 anos
Por outra banda, o titular de Promoción Económica e Urbanismo salienta que Poio pecho o ano 2022 co menor índice de desemprego acadado desde o ano 2007. Por primeira vez en 16 anos, o número de persoas sen traballo ficou por debaixo do milleiro. En concreto, foron 898, o que se traduce nunha porcentaxe do 11,5%. Para atopar un dato similar é preciso remontarse ao ano 2007, con 746.
Gregorio Agís destaca que na última década a redución do desemprego en Poio reduciuse en practicamente o 50%. “O ano 2012 rematámolo con 1.791 persoas sen emprego, sendo este o tope máximo acadado no que vai de século, nun contexto que daquela estaba moi condicionado pola crise económica iniciada en 2008.
Afortunadamente, a través das nosas competencias e impulsando diferentes iniciativas fomos quen de axudar a que esa cifra fose descendendo de xeito paulatino ata os 898 actuais”, explica o concelleiro do PSdeG-PSOE, que reafirma o compromiso do Concello á hora de seguir organizando e dando vida a diferentes actividades, cursos e accións encamiñadas a fomentar o emprendemento, a formación e a dotación de ferramentas prácticas para a busca activa de emprego. “Comezamos o ano 2022 con 1.000 desempregados e desempregadas e esta cifra reduciuse en máis dun 10%, temos que seguir traballando nesta liña para que eses datos continúen á baixa”, conclúe Gregorio Agís.
