Unha vintena de persoas poderán ser beneficiarias deste centro de iniciativa municipal que conta coa axuda da Xunta.
A conselleira de Política Social, Fabiola García Martínez, e o alcalde da Lama, Jorge Canda Martínez, visitarán oficialmente este luns o remate das obras do Fogar Residencial e Centro de Día para Maiores da Lama que cun investimento de preto de 500.000 euros foi construído por iniciativa do Concello e que conta coa axuda económica da Xunta de Galicia.
Este acto oficial, que terá lugar o vindeiro luns 30 de xaneiro a partir das 11:30 horas, consistirá nunha visita ás instalacións recén rematadas, ubicadas na rúa Miguel Carbajal, e que ocupan unha superficie útil duns 300 metros cadrados.
A infraestrutura xerontolóxica contén dous espazos diferenciados: un para a vivenda residencial e outro para o centro de día. O reservado para vivenda residencial estará dotado de habitacións con baño incorporado, e a área dedicada ao centro de día inclúe un comedor, unha sala polivalente, unha cociña e outras instalacións necesarias para o seu funcionamento.
Esta actuación, impulsada polo Concello da Lama supón un avance decidido na atención ás persoas maiores no municipio. O centro será de titularidade pública aínda que a súa xestión será externalizada a través dun concurso público aberto que permitirá poñelo en funcionamento o máis axiña posible.
ACTO PÚBLICO ABERTO Á VECIÑANZA
O acto será público e aberto á veciñanza en xeral que poderán achegarse ata o novo edificio para coñecer as súas dimensións e posibilidades así como o modelo de funcionamento promovido desde o Concello da Lama.
