• O candidato amósase máis ilusionado que o primeiro día “porque estamos conseguindo grandes cousas para o noso concello”.
• Luis López: “cando o PP colle os gobernos faino ben, e mostra disto é todo o traballo feito polo alcalde e o seu equipo nestes anos. O seu liderazgo está consolidado, está facendo as cousas cunha xestión seria e rigorosa. Ese é o camiño para obter os mellores resultados en maio”.
Juan Manuel Vidal Seage optará á reelección á alcaldía do Concello de Pontecesures nas eleccións municipais de maio. Así o confirmou esta mañá o candidato, diante de representantes da xunta local do partido, do presidente provincial, Luis López, e da secretaria xeral, Luisa Piñeiro.
Vidal Seage agradece todo o apoio e a confianza dos seus compañeiros e dos veciños de Pontecesures, e amosouse “máis ilusión incluso que o primeiro día”, porque di, “estamos conseguindo grandes cousas para Pontecesures. Temos en marcha un proxecto de concello que se está notando, que é coñecido e compartido cos veciños, no que se aposta por servizos esenciais de calidade e por potenciar os nosos recursos, por atraer emprego e fixar poboación, e agora non se pode deter. Debemos darlle continuidade”.
Pola súa parte, o presidente provincial Luis López sinalou que “cando o PP colle os gobernos faino ben, e mostra disto é todo o traballo feito polo alcalde e o seu equipo nestes anos. O seu liderazgo está consolidado, está facendo as cousas moi ben, cunha xestión seria e rigorosa. Ese é o camiño para obter os mellores resultados en maio”.
Asemade, recordou que a política local é fundamental para mellorar a calidade de vida dos veciños e para transformar todo un pobo. “Juan Manuel e o seu equipo encarnan ese modelo de xestión e de relación entre un alcalde e os seus veciños. Unha xestión baseada na atención, na colaboración, no diálogo, no entendemento e na procura do interese xeral”.
