Nos orzamentos de 2022 o BNG, despois de atender as peticións da veciñanza de Paradela, logrou incluír unha partida orzamentaria que permitía aprobar os orzamentos coa nosa abstención. Esta partida incluía: o pintado interno e externo, a reparación integral do tellado, a colocación dunha rampla externa para facilitar a accesibilidade, transporte e manexo do equipamento ao piso superior e o acondicionamento do exterior da casa da cultura de Paradela.
No pleno ordinario do 27/01/2023 o BNG de Meis preguntou sobre a situación actual da casa da cultura de Paradela, pois a día de hoxe aínda non se fixo o arranxo orzamentado e coas chuvias dos últimos tempos a casa da cultura está totalmente anegada impedindo calquera tipo de actividade coa máis mínima normalidade.
A alcaldesa recoñeceu en pleno a situación da casa da cultura e comprometeuse a facer unha reparación integral comezando polo tellado e levando a cabo o pactado co BNG nos orzamentos do 2022.
Desde o BNG ficamos satisfeitos coa promesa plenaria da alcaldesa e lembramos que no noso boletín de Abril do 2022 xa sacamos na portada que o arranxo integral da casa da cultura estaba nos orzamentos pois foi un acordo do BNG coa veciñanza de Paradela. Desde o BNG urximos esta actuación dada a situación actual da casa da cultura que impide o seu uso normal e o prexuízo que iso lle causa á veciñanza.