A formación centrarase nas tecnoloxías dixitais para tramitacións coas administracións e no manexo das redes sociais
A Asociación Mulleres Salgadas e o Concello de Cambados organizan un Curso de “Habilidades Dixitais” destinado a mulleres do mar.
A formación, de carácter gratuito e con dez prazas dispoñibles, impartirase na Casa de Cultura de Corbillón os martes de cada semana durante os meses de febreiro, marzo abril e maio en horario de 17.30 a 20 horas.
A iniciativa dá continuidade ao curso realizado a finais de 2022 sobre capacitación dixital básica e amplía os coñecementos adquiridos.
Segundo explica a vicepresidente de Mulleres Salgadas, Sandra Amézaga, nesta ocasión as materias a abordar centraranse no manexo das redes sociais e nas tecnoloxías dixitais necesarias para tramitacións coas administracións, como o caso das sedes electrónicas.
O alcalde Samuel Lago considera fundamental manter este tipo de colaboracións con colectivos como Mulleres Salgadas co fin de favorecer a empregabilidade e reducir a fenda de xénero.
O prazo de inscripción xa está aberto a través do teléfono 619 17 60 70.
