• Denuncian que o Concello da Cañiza tivo que devolver á Xunta parte dos fondos que recibe para dependencia por non ter asignadas todas as horas disponibles.
O Partido Popular denuncia que o Goberno local está ocultando as cifras reais das persoas dependentes que están en lista de espera no Servizo de Axuda no Fogar. Así, din que dos usuarios que están pendentes de que se lles asignen as horas, o alcalde Luis Piña só recoñece tres.
Foi durante o último pleno municipal, no que a concelleira popular Pilar Vicente preguntou sobre a situación do SAF na Cañiza, máis concretamente, polo número de persoas que se atopan na actualidade en lista de agarda, para poder recibir este servizo de axuda no fogar.
Segundo as declaracións do voceiro do Partido Popular, Miguel Domínguez, “o alcalde non tivo ningún reparo en deixar sen a palabra á miña compañeira ao verse acorralado polos datos que manexaba, e que distan moito do que Piña nos quixo vender”.
Durante as sesión plenaria, Piña afirmou ter “máis ou menos 3 persoas en grado III esperando a ser atendidas”, e evitou facer referencia ao resto de persoas que se atopan na mesma situación, aínda que teñan unha graduación diferente. Ademais, desde o PP critican que o Concello da Cañiza ten sen asignar aínda 176 horas de axuda, unha decisión incomprensible cando hai persoas dependentes e coidadores que están pedindo esa atención.
Segundo os datos aos que tivo acceso Miguel Domínguez, as persoas que se atopan actualmente en lista de espera son 55: 9 en grado III (gran dependencia), 19 en grado II (dependencia severa) e 27 en grado I (dependencia moderada). Todas estas persoas terían toda a documentación en regra e os expedientes aprobados para ser perceptores deste servizo.
O PP recorda que a Xunta da Galicia vén de aumentar nos últimos anos, a aportación que fai aos concellos para este cometido, chegando a practicamente o 100% do custo do servizo, reducindo as aportaciós dos consistorios a unha mínima parte.
O Concello da Cañiza, tivo que devolver parte destes fondos nos últimos anos de mandato, ao non ter asignadas todas as horas dispoñibles, e chegando a perder, segundo apunta o voceiro popular, “case 10.000€ ao mes”.
“Piña xunto coa concelleira de Benestar Social, están abandoando a 55 persoas con nome e apelidos, a 55 familias, cada unha coas súas circunstancias, a pesar de ter horas dispoñibles para asignar e de ter parcticamente o servizo subvencionado ao 100% por parte da Xunta de Galicia”. Este é un tema sensible e relevante como para que o alcalde manipule os datos nun pleno municipal e trate o tema sen ningún tipo de rigor”, engade Miguel Dómínguez.
