Ao alcalde de Vilaboa parécelle “lamentable” que xustifique a transferencia da PO-264 e que asuma que sexa o Concello quen financie a reforma
A proposta realizada pola conselleira de Infraestruturas para a PO-264, consistente en transferir o vial de titularidade autonómica ao Concello de Vilaboa para que este asuma a reforma integral que precisa, sorprendeu ao alcalde, César Poza, que confiaba nunha resposta máis responsable por parte da Xunta.
“A postura da Xunta foi sorprendente pero a do PP local é abraiante”, resume César Poza, referíndose ao “total servilismo” con que o Partido Popular acepta e xustifics que a Xunta de Galicia descarte facer investimentos nun vial da súa competencia que non so presta servizo aos veciños de Vilaboa e que ten pouco máis de 300 metros no término municipal.
“Sabían con antelación cal sería a postura da Xunta e lonxe de defender os intereses de Vilaboa adoptaron unha actitude partidista e partidaria sen valorar o inxusto dunha transferencia dese calado”. A César Poza parécelle moi preocupante que o PP, ante unha situación de grave inseguridade viaria para os residentes neste tramo de estrada en Paredes, opte “por poñerse a contar o tempo a ver si había un ano ou 10 meses que pediramos a reunión coa Xunta e a proferir insultos nas redes e nos medios antes que defender diante do seu partido e dunha administración na que gobernan os dereitos da xente de Vilaboa”.
A César Poza parécelle especialmente grave a axilidade do Partido Popular xustificando a proposta da Consellería de Infraestruturas, trasladando á opinión pública os seus “patéticos argumentos” antes incluso de se producir a reunión en Santiago.
César Poza, que tilda o comportamento do PP de Vilaboa de “total deslealdade institucional”, considera que a postura do portavoz, Alberto Acuña, “retratouno diante da súa veciñanza: agora todo o mundo sabe o que pode esperar del: servilismo aos seus.”
