• As Pandereteiras do Val de Quireza serán as encargadas de amenizar a sesión vermú que terá lugar despois da misa e a procesión
O alcalde de Cerdedo-Cotobade, Jorge Cubela, a tenente de alcalde Lourdes Ovelleiro e os membros da Comisión de Festas de Santa Apolonia de Quireza, Alberto Barros Barros, Vanessa Seijas Silva e Julio Porto Mourín, fixeron público o programa lúdico-festivo que se desenvolverá o sábado 11 e o domingo 12 de febreiro.
O programa festivo arranca o sábado 11 de febreiro pola mañá coa celebración ás 12 do mediodía dunha misa solemne na honra de Santa Apolonia e a conseguinte procesión. Unha vez rematada terá lugar a tradicional sesión vermú amenizada polas Pandereteiras do Val de Quireza que interpretarán varias pezas do folclore local moi coñecidas e populares nesta parroquia.
Pola noite, a partir das 23 horas, terá lugar a verbena que estará a cargo da Orquestra Olimpus e Discomóvil Chocolate que serán os encargados de prolongar os festexos ata altas horas da madrugada.
Todos estes actos desenvolveranse baixo unha gran carpa e haberá calefacción a cargo de canóns de calor para facer máis agradable a festa e a estancia do público.
O programa festivo rematará o domingo 12 á mediodía coa celebración dunha misa solemne na honra de Santa Apolonia Pequena que servirá para completar esta fin de semana festiva en Quireza.
Pola súa banda, o alcalde de Cerdedo-Cotobade, Jorge Cubela felicitou aos membros da comision de festas de Santa Apolonia de Quireza polo labor desenvolvido para preparar unhas actividades que servirán para dinamizar a parroquia e manter vivas as tradicións festivas na honra desta santa tan popular en todo o Val de Quireza.
