― O último andar da torre asoma xa a máis de 40 metros de altura en dúas das tres franxas que conforman a zona de hospitalización
― Prevese que no próximo mes se remate a totalidade da estrutura do basamento
― Nas lousas estruturais que conforman a zona de hospitalización, a partir da quinta planta aplicouse unha técnica novidosa denominada “lousa de transición postesada”, que converterá esta área sanitaria nun referente construtivo
― Unha vez rematado o búnker de radioterapia, nos vindeiros meses acometeranse os traballos estruturais no muro de contención da avenida Montecelo, a zona dedicada a instalacións e dársenas de carga, así como a última franxa da “Z” de hospitalización
― Tamén se avanza nos traballos de solos, tabicaría ou fachadas e levouse a cabo o acondicionamento interno e a definición dos espazos habitacionais e de consultas
― A Xunta segue avanzando na execución do Hospital Público de Montecelo, que nesta 1ª fase supón un investimento de máis de 130 M€
A execución do Hospital Público de Montecelo de Pontevedra acadará o vindeiro mes o noveno andar sobre a base de cimentación.
O último andar da torre asoma xa a máis de 40 metros de altura en dúas das tres franxas que conforman a zona de hospitalización.
Dado o progreso dos traballos, tamén se prevé que no próximo mes se remate a totalidade da estrutura do basamento.
Nas lousas estruturais da “Z” que conforman a zona de hospitalización, a partir da quinta planta onde os piares deben adaptarse á nova forma do edificio, aplicouse unha técnica construtiva novidosa en Galicia.
Esta técnica pioneira, coñecida como “lousa de transición postesada”, converterá a área sanitaria de Pontevedra e do Salnés nun referente construtivo de modernidade e vangarda. O seu emprego confire unha compresión extra ao formigón e actúa como unha segunda cimentación do edificio, sobre a que arrinca o resto das lousas da “Z” da hospitalización.
Os traballos executados ata agora e os volumes de material empregados revelan a magnitude da obra, na que se utilizaron máis de 4 millóns de quilos de aceiro pasivo (incorporado ao formigón), máis de 100.000 quilos de aceiro activo, máis de 75.000 m2 de lousa e 40.000 m3 de formigón.
A partir de agora e unha vez rematado o búnker de radioterapia, nos vindeiros meses acometeranse os traballos estruturais no muro de contención da avenida Montecelo, a zona dedicada a instalacións e dársenas de carga, así como a última franxa da “Z” de hospitalización.
Tamén se avanza no resto de traballos, como solos, tabicaría, fachadas ou instalacións. Ademais levouse a cabo o acondicionamento interno e a definición dos espazos habitacionais e de consultas. A maioría das habitacións ocuparán a torre de hospitalización, serán amplas e disporán de vistas.
Hospital Público de Montecelo
O Goberno galego continúa progresando nas obras do Hospital Público de Montecelo, cuxa primeira fase supón unha achega autonómica de máis de 130 millóns de euros. No seu conxunto, o Goberno galego investirá 155 millóns de euros para dotar Pontevedra e a súa área dun hospital de referencia.
As obras en execución consisten na construción dun novo edificio hospitalario cunha superficie de preto de 92.000 metros cadrados distribuídos en 10 andares, desde o -1 ata o 9.
As instalacións constan dun edificio dianteiro, no que se situarán as consultas externas para os servizos de hematoloxía, medicina preventiva, cardioloxía ou dixestivo; e outro traseiro para as urxencias, o bloque cirúrxico, a UCI pediátrica ou os laboratorios. Sobre esa zona de basamento elévase un terceiro bloque que se corresponde co edificio de hospitalización.
