- Manterase por undécimo ano consecutivo a conxelación de taxas municipais
- En total destinaranse case 2 millóns a investimentos
- O pleno da corporación municipal de Soutomaior aprobou esta mañá os seus orzamentos para este ano. A previsión ascende a case cinco millóns de euros (4.806.000 €), aos que haberá que sumar os investimentos que se realizarán con financiamento procedente da deputación e outros entes supramunicipais.
- O alcalde de Soutomaior, Agustín Reguera, definiu estes novos orzamentos como “realistas e co obxectivo claro de axudar aos veciños e ás empresas locais. Aseguramos o mantemento de todos os servizos, mantemos a Débeda 0 e seguimos incrementando a protección social coas taxas conxeladas por undécimo ano consecutivo”, explicou o rexedor durante o pleno destacando que “por algo somos un dos Concellos con menor presión fiscal sobre os seus veciños con 232 € anuais. Hai concellos na comarca que triplican esa cifra”.
- As partidas destinadas a Deporte, Xuventude e Medio Ambiente mantéñense con respecto ao exercicio pasado e reflicten actuacións previstas como a mellora de varios roteiros e a potenciación do Plan Municipal de Reciclaxe e Compostaxe, que “está a ser todo un éxito e no que xa participan 500 familias do municipio”, apuntou o alcalde.
- A partida que rexistra un maior aumento é a destinada ás políticas de Atención Social Primaria, que crece un 26%pasando de 305.000 a 380.000 euros. “Un aumento que servirá para garantir que, do mesmo xeito que este ano, atendemos o 100% das emerxencias sociais que se produciron no Concello”, indicou a edil de Servizos Sociais, Cristina González.
- No relativo aos investimentos en infraestruturas, ademais dos recursos propios que se destinarán a melloras na rede de saneamento, a compra dos terreos para a nova depuradora e a recuperación do antigo colexio Oliveira, incorpóranse ao orzamento deste ano os fondos reservados o pasado exercicio para a adquisición dos terreos do centro de saúde e a construción do novo skate park. Ademais, haberá que sumar 411.000 euros procedentes do Plan Concellos e os convenios coa Xunta de Galicia, así como as actuacións que actualmente se atopan en estado de execución, como as que se están levando a cabo no Camiño de Santiago. “En total significa que este ano se destinarán case 2 millóns de euros para investimento directo en melloras para o municipio”, explicou o alcalde durante o pleno.
- Do mesmo xeito, “hai gastos, como o relacionado co consumo eléctrico, que podemos conter grazas ás actuacións de eficiencia enerxética que estamos a levar a cabo desde hai anos. Melloras que continuarán este ano e que, visto o prezo actual da enerxía, son un gran acerto deste goberno, tanto a nivel de coidado do medio ambiente como no de xestión económica”, explicou Reguera.
- Por último, o alcalde explicou que este ano se destinarán case 50.000 euros para subvencións a clubs deportivos do municipio, deportistas individuais e a escola de música. “Unha pequena axuda para que os nosos deportistas poidan seguir levando o nome de Soutomaior polo mundo”, concluíu o rexedor.
- Conxelación de taxas municipais
- “Os veciños de Soutomaior pagarán o mesmo en 2023 que en 2012”, apuntou Reguera durante o pleno anticipando unha nova conxelación de taxas municipais para este ano. Unha medida que o goberno local adoptou por primeira vez en 2013 co obxectivo de conter a presión fiscal sobre os veciños durante a crise económica e que agora, máis dunha década despois, mantense para paliar no posible as consecuencias económicas ocasionadas pola inflación dos prezos.
- Así, impostos como a rodaxe dos vehículos, a rede de sumidoiros, vaos de aparcamento, obras e todos os derivados de ordenanzas fiscais municipais manterán o seu importe un ano máis “porque o que menos necesitan agora os veciños son máis impostos e gastos”, finalizou Reguera.
O concello de Soutomaior aproba un orzamento de 4.8 millóns para o 2023
- Anuncio -
