• Lucio pedirá tamén asumir o compromiso de conxelar as taxas municipais: “Con esta política e a xestión actual, o Goberno local está abocando a unha subida fiscal para pagar o incremento do servizo, que pasou de 125.000 euros anuais a 207.000”.
• Esixirán explicacións na sesión sobre o proceso de contratación do servizo de recollida de lixo e, chegado o caso, se produza unha asunción de responsabilidades.
• Volve a solicitar a Marta Giráldez “que cese no seu empeño de recorrer unha sentencia demoledora, que demostra a súa falta de capacidade na xestión do concello e que o único que vai provocar é que se dilapide máis diñeiro de todos os veciños de Meis en gastos xudiciais”.
O Partido Popular de Meis presentará no próximo pleno municipal unha iniciativa para que o Goberno local e a alcaldesa, Marta Giráldez, expliquen e aclaren todo o proceso e, chegado o caso, se produza unha asunción de responsabilidades, pero tamén proporá adoptar un pacto en favor dos veciños de Meis, para consensuar un proxecto adecuado para prestar a recollida de lixo e limpeza que atenda aos intereses xerais e reais da cidadanía e do concello.
Este pacto pasaría porque sexa a próxima corporación municipal a que adopte os acordos de xeito consensuado, tendo en conta non só a calidade do servizo, senón tamén as frecuencias na recollida do lixo e a limpeza, pero ademais se aposte por conxelar o prezo das taxas, que están fixadas en 54 euros anuais para as vivendas e que desde o PP entenden que é unha cifra que non se debe incrementar. “Con esta política e a xestión actual, o Goberno local está abocando a unha subida fiscal para pagar o incremento do servizo, que pasou de 125.000 euros anuais a 207.000. Coa situación que teñen as familias, é impensable que se lle aumenten as taxas municipais”.
Con todo, para a candidata á alcaldía e voceira do PP, Marta Lucio, “a alcaldesa ten que facilitar todas as explicacións que os veciños necesitan. Teñen que saber por que adxudicou a dedo un contrato que está prexudicando economicamente aos veciños”. Así, recorda que o servizo que se prestaba a través da Mancomunidade do Salnés e que agora é anulado polo Xulgado, custaba un 65% máis que o anterior contrato e se ofrecía o mesmo servicio.
Por iso, volve a solicitar a Marta Giráldez “que cese no seu empeño de recorrer unha sentencia demoledora, que demostra a súa falta de capacidade na xestión do concello e que o único que vai provocar é que se dilapide máis diñeiro de todos os veciños de Meis en gastos xudiciais”.
Finalmente, o PP de Meis lamenta que o BNG saia agora de suposto defensor dos veciños e critique a xestión da alcaldesa neste asunto, “cando realmente sostén a Marta Giráldez e ao PSOE no Goberno de Meis, e a partir de maio, se ten a oportunidade, volverá a facelo sen ningún tipo de dúbida”.
