· O candidato á alcaldía de Ourense asegura que “xamais podería exporme un proxecto de cidade sen escoitar aos mozos, como tamén fixeron eles saíndo á rúa”
· Cabezas adianta que “devolveremos este traballo á cidadanía transformado en accións concretas que explicaremos por todos e cada un dos barrios de Ourense”
· O presidente da agrupación local de Novas Xeracións, Manuel Novoa, valora o interese do candidato por “querer saber exactamente o que pensamos os mozos; por iso lanzámonos a ese labor de escoita na rúa”
· Entre as principais demandas recollidas durante a campaña figura a mobilidade, con máis conexións co campus universitario, a falta de seguridade nocturna e recuperar a oferta cultural na cidade
O candidato á alcaldía de Ourense polo Partido Popular, Manuel Cabezas, incorporará ao seu proxecto de cidade un detallado estudo sobre as máis de 1.500 demandas e suxerencias realizadas polos mozos ourensáns durante a campaña “Que Ourense queres?, levada a cabo por Novas Xeracións durante os meses de xaneiro e febreiro en seis barrios da capital.
Na sede provincial, onde os membros da organización xuvenil prepararon un mural con todas as notas recompiladas, Manuel Cabezas afirmou que o traballo realizado polos mozos do PP “é un extraordinario exemplo do saber escoitar, un magnífico labor de campo preguntando directamente á xente que é o que quere para a súa cidade”.
“Son os mozos quen constrúe o noso futuro”, dixo Manuel Cabezas, quen asegurou que “xamais podería exporme un proxecto de cidade sen escoitalos, como tamén fixeron eles saíndo á rúa”. Razóns máis que suficientes, dixo, “para consideralos como uns dos mellores compañeiros de viaxe que teño neste reto”.
Despois de Semana Santa, sinalou o candidato, “devolveremos este traballo á cidadanía transformado en accións concretas que explicaremos por todos e cada un dos barrios de Ourense”. Unha aposta de futuro, engadiu, “feita tamén coas achegas de asociacións e colectivos cos que nos reunimos, que entendemos positivas para a cidade e polas que loitaremos paso a paso”.
MÁIS MOVILIDAD URBANA E OFERTA CULTURAL
O presidente da agrupación local de Novas Xeracións, Manuel Novoa, tamén valorou “a capacidade de escoita que vimos no noso candidato, o que nos animou a saír á rúa e escoitar á súa vez á mocidade”.
Dada a diferenza xeracional, “Manuel Cabezas quería saber exactamente o que pensabamos os mozos ourensáns para sumar novas ideas ao seu proxecto; e como cremos que non se pode pensar no futuro sen ternos en conta lanzámonos a ese labor de escoita”.
Entre as ideas e demandas máis numerosas recibidas durante a campaña figura a mobilidade, aspecto sobre o que os mozos piden máis conexións co campus universitario e a estación intermodal. Cabe sinalar que case o 50 % das peticións de mellora de mobilidade foron recollidas en zonas como San Francisco e O Couto, neste último barrio con maior insistencia nas conexións co complexo hospitalario.
Outro dos aspectos que destaca o informe é o problema da seguridade nocturna, sobre o que expresan a súa preocupación preto dun 30 % dos mozos. Ademais, un de cada tres post-it que os participantes na campaña deixaron nos murais pide unha maior oferta cultural na cidade. O arranxo e humanización de rúas e un impulso decidido ao termalismo foron outras das suxerencias máis repetidas, con máis do 14 % e o 9 % de peticións, respectivamente.
