O deputado nacionalista Luís Bará formulará preguntas á Xunta o vindeiro xoves día 20 sobre as irregularidades detectadas no informe do Consello de Contas
O deputado do BNG Luís Bará formulará o vindeiro xoves día 20, na comisión 1ª do parlamento galego, preguntas ao goberno da Xunta en relación co Informe do Consello de Contas“Anteproxecto de informe de fiscalización horizontal sobre percepcións económicas non salariais e indemnización de gastos efectivos en entidades locais: indemnización por razón de servizo, asistencias e otros cargos”, dado a coñecer o pasado mes de marzo.
Unha das conclusión do informe é que edís dos gobernos municipais de Valga cobraron dietas ilegais desde o ano 1991 até o 2017. Segundo Contas, “tanto as reunións como as percepcións de asistencia á comisión de coordinación non se adecúan á legalidade ao non estar previsto como órgano complementario no Regulamento Orgánico Municipal”.
Contas sinala que a creación da chamada “comisión de coordinación de concelleiros/as delegados/as ” fíxose o 15 de xuño de 2017 mediante acordo plenario, en tanto que “órgano complementario de natureza consultiva e deliberante” mais non se adaptaba á legalidade vixente por non participar un funcionario ou funcionaria pública para levantar acta e dar fe do contido das reunións.
A análise da documentación achegada polo concello de Valga pon de manifesto o incumprimento da normativa legal desde o ano 1991 e a percepción irregular de cantidades económicas desde esa data.
O informe inclúe na páxina 69 un cadro de percepcións desde o 17 de xuño de 2017 até o 31 de decembro de 2021. E sinala a falta de transparencia e o obstrucionismo do goberno municipal á hora de facilitar os datos de anos anteriores.
