• As solicitudes poderán presentarse de xeito telemático a través da Sede Electrónica
• A entrega dos galardóns levarase a cabo o xoves 22 de inicio, antes da lectura do pregón das Festas de San Xoán
O Concello de Poio informa de que xa está aberto o prazo para a presentación de propostas para a concesión dos Premios ao Deporte San Xoán 2022- 2023, que se impulsan, un ano máis, coa intención de recoñecer a traxectoria e os éxitos dos e das deportistas locais, así como o labor realizado ao longo deste curso por parte de clubs e entidades con actividade deportiva no municipio.
O período para a presentación de propostas ficará aberto ata este sábado, 10 de xuño.
Esta xestión deberá facerse a través da Sede Electrónica do Concello de Poio. Deberá constar no documento o nome dos e das candidatas e das entidades deportivas propostas, cunha motivación para a súa elección. Á hora de establecer estes recoñecementos teranse en conta cuestións como a superación de resultados en anos precedentes, a valoración de éxitos individuais ou colectivos, logros a niveis provincial, autonómico, estatal, europeo ou mundial, consecución de logros non acadados en tempadas anteriores, ascenso de categorías, representacións de deportistas locais en clubs de primeira liña e o recoñecemento ao traballo, voluntariedade, promoción, difusión e implicación como eidos fundamentais para fomentar o deporte tanto no noso municipio como máis alá de Poio.
A elección dos e das gañadoras nas diferentes categorías terá lugar na sesión convocada polo Consello Municipal de Deportes o vindeiro luns 19 de xuño, no que os e as integrantes (representantes do eido deportivo e dos grupos da Corporación) analizarán as propostas que se presenten. Como xa é tradición, a entrega dos premios terá lugar o día 22, coincidindo co inicio da programación das Festas de San Xoán, antes da lectura do pregón.
