O BNG de Viveiro tratou de lograr un cambio de goberno “de esquerdas e ilusionante” que Por Viveiro e PSOE non aceptaron
O BNG de Viveiro tratou até o último momento lograr o apoio para a alcaldía da súa candidata Miriam Bermúdez. “O BNG amosou ser a ilusión e a esperanza dun goberno de esquerdas en Viveiro, triplicando a nosa representación. Intentamos negociar un proxecto novo e progresista con Por Viveiro e o PSOE, pero Por Viveiro optou por manter ao goberno de María Loureiro, que perdeu a metade dos apoios e contradecindo as súas propias promesas” manifestou a candidata nacionalista. En canto á participación no goberno, Bermúdez indicou que “valoraremos en asemblea as posibilidades. Polo de agora centrámonos en pecharlle o paso a un PP que xa amosou a súa deriva á extrema dereita noutros gobernos do Estado”.
Dende o BNG manifestan que nas negociacións chegaron propostas inaceptables que demoraron a toma de decisións: “Bernardo Fraga propúxose como alcalde a media xornada de forma inamovible e innegociable ata o último momento. Evidentemente era algo inaceptable. O BNG é un proxecto en alza, serio e traballador, aberto a todas as posibilidades co resto de partidos. Pérdese unha oportunidade histórica de darlle un aire novo a Viveiro. O BNG seguirá traballando para que o cambio chegue”.
