“Ninja” poderase ver no Auditorio da Casa da Cultura da Cañiza ás 17:00 horas e “A louca historia de Galicia” no Auditorio Municipal do Rosal ás 19:00 horas
O Ciclo de Teatro da Deputación de Pontevedra “Tornar ás táboas” chega este domingo ata A Cañiza e Rosal coas obras “Ninja” e “A loca historia de Galicia”. O auditorio da Casa da Cultura da Cañiza acolle ás 17:00 horas “Ninja”, un espectáculo de Teatro Ghazafelhos enfocado a un público infantil e familiar. Pola súa o Auditorio Municipal do Rosal será o escenario de “A louca historia de Galicia” que interpretará Fulano, Mengano e Citano a partir das 19:00 horas para público mozo e adulto. A entrada, para ambos espectáculos, é libre ata completar aforo.
“Ninja” é a nova proposta da compañía ferrolá Teatro Ghazafelhos, a súa vixésimo sexta produción en dezaseis anos de traxectoria. É unha peza dirixida a un público familiar, a partir de cinco anos, que aborda o acoso escolar a través dunha historia chea de humor e de reflexións sobre o respecto, o apoio mutuo e a diversidade, e na que as artes marciais e a cultura oriental son as protagonistas. O espectáculo foi finalista á mellor proposta familiar nos Premios maría Casares 2023.
“A louca historia de Galicia”, unha peza para público mozo e adulto, é un percorrido, en clave de humor, a través da historia da comunidade que leva ao espectador por apaixonantes períodos de luz e sombras, que, como destaca a compañía, “fixeron de nós o que somos, ou o que algúns pensan que somos”. “Unha historia –engaden- que demostra que os galegos sabemos rirnos de nós mesmos, e dos outros…”, e que sigue crecendo cada ano.
Co ciclo teatral “Tornar ás Táboas” a Deputación de Pontevedra vai achegar entre outubro e decembro un total de 49 funcións gratuítas e dirixidas a todos os públicos a outros tantos concellos da provincia de menos de 20.000 habitantes, coa participación de trinta compañías galegas que ofrecerán unha ampla variedade de espectáculos.
