O presidente Luis Menor reuniuse con Luciano Rivero e José Luis Suárez para analizar os proxectos de cooperación en marcha en ambos municipios, así como na mancomunidade de Verín
O presidente da Deputación, Luis Menor, mantivo esta mañá un encontro de traballo cos rexedores de Cualedro e Monterrei, Luciano Rivero e José Luis Suárez, no marco da rolda de contactos que está a manter con todos os representantes das entidades locais ourensás trala súa chegada á presidencia da Deputación.
Co alcalde de Cualedro, Luis Menor analizou unha proposta de colaboración para a rehabilitación dun edificio que antigamente albergaba as oficinas dunha entidade financeira e que foi doado ao concello. Agora, o rexedor proxecta neste inmoble a construción de dúas vivendas sociais e o acondicionamento dun espazo para os servizos sociais municipais.
Polo que respecta a Monterrei, o alcalde abondou na necesidade de manter o convenio asinado a tres bandas entre o Concello, a Deputación e a Xunta de Galicia para a conservación do castelo, ademais das actuacións pendentes no balneario de Requeixo, acometidas pola institución provincial grazas a un convenio coa entidade local, así como a continuación da senda peonil que se está a construír na estrada provincial OU-1021, onde a Deputación xa investiu 200.000 euros.
Ambos alcaldes tamén falaron sobre proxectos supramunicipais, dado que José Luis Suárez tamén preside a Mancomunidade de Municipios de Verín. Na xuntanza analizaron o mantemento da colaboración coa Fundación para a protección de Discapacitados Psíquicos da comarca de Verín, entidade que á súa vez preside o alcalde de Cualedro.
Como no caso dos dez rexedores recibidos nesta semana, Luis Menor aproveitou o encontro para explicar algúns dos detalles recollidos no Plan CooperOU, o novo modelo de financiamento para a cooperación cos concellos.
Estes contactos súmanse os mantidos esta semana cos alcaldes e alcaldesas de Vilardevós, Eva María Pérez; Arnoia, Rodrigo Aparicio; Leiro, Francisco José Fernández; Entrimo, Ramón Alonso; Verea, José Antonio Pérez; Ramirás, Isabel Gil; e Padrenda, Manuel Pérez.
