A xornada está dirixida ás máis de 70 persoas usuarias do servizo nos concellos de Barro, Caldas de Reis, Catoira, Cuntis, Moraña, Pontecesures, Portas e Valga
A Deputación de Pontevedra organiza este xoves 23 de novembro en Caldas de Reis unha xornada de dinamización no marco do programa “Cidadanía Activa-Rede MaiorES” do servizo de teleasistencia domiciliaria que se desenvolve por medio dun convenio de colaboración entre a institución provincial e os concellos da provincia de menos de 20.000 habitantes.
Á xornada están convocadas as máis de 70 persoas que empregan na actualidade este servizo nos concellos da contorna, concretamente en Barro, Caldas de Reis, Catoira, Cuntis, Moraña, Pontecesures, Portas e Valga. Terá lugar no auditorio municipal de Caldas ás 11:00 horas, cunha duración aproximada dunha hora, e xirará arredor da dinámica da agricultura.
A sesión consistirá nun coloquio sobre a terra e a agricultura como parte da identidade do pobo galego, que supuxo non só unha forma de traballo senón que servía como nexo de unión entre as aldeas e a veciñanza, achegando así unha gran riqueza cultural entre os núcleos de poboación. As persoas usuarias poderán asistir tanto soas como cunha persoa acompañante e durante a xuntanza poderán coñecerse e compartir experiencias.
O servizo de teleasistencia domiciliaria da Deputación de Pontevedra chega na actualidade a un total de 641 persoas en todo o territorio da provincia. O servizo, que se vén prestando desde 1998, está destinado a persoas maiores ou discapacitadas que vivan soas ou ás persoas que estean acompañadas e teñan as súas facultades moi minguadas para valerse na vida cotiá.