Tras a presentación por parte do BNG de Meis das alegacións contra a subida de impostos asinadas pola veciñanza, e como xa anunciara o noso portavoz municipal, Xoán Manuel Vázquez, desde o BNG de Meis íamos facer todo o que estivese nas nosas mans para paralizar a inxusta subida de impostos que o goberno local do Partido Socialista pretendía facer xa para o 2024.
Durante a lexislatura anterior non houbo unha soa subida grazas ao voto do BNG, unha vez acadada a maioría absoluta unha das primeiras medidas que pretendía levar a cabo o Psoe de Meis era esta subida de impostos.
Desta volta, o Psoe convocou un pleno extraordinario o 3 de novembro para subir os impostos, o BNG votou en contra advertindo que ía facer o imposíbel para evitar esta subida a pesar da súa maioría absoluta. Recorrémolo por defecto de forma e déusenos a razón. O 9 de novembro fixeron outro pleno extraordinario, pola presa que tiñan en subir os impostos, pleno ao que o BNG non asistiu pois o horario ao que se convocou era para evitar que a maioría da veciñanza puidese presenciar aos concelleiros do PSOE de Meis votar por segunda vez nunha semana subir os impostos á veciñanza.
Lembramos que o partido socialista de Meis, fixo unha campaña electoral hai escasos 5 meses nos que constantemente alardeou de dúas cousas, de ter gobernado durante 4 anos sen subirlle os impostos á veciñanza, e de ter sido uns dos gobernos mais austeros da historia de Meis en canto a salarios, e puidemos comprobar como mentiron á veciñanza, pois nada máis gañar as eleccións, con maioría absoluta, a primeira medida que fixeron foi subirse o salario das concelleiras liberadas en máis dun 63%, e a segunda medida pretendían subirlle os impostos aos veciños e veciñas de Meis en máis dun 40%. (20% do lixo e 20% do IBI).
Desde o BNG de Meis levamos a cabo unha recollida de sinaturas en contra da subida de impostos, recabando máis de 200 sinaturas de veciños e veciñas de Meis que foron rexistradas no Concello polo noso portavoz e outro membros do BNG de Meis.
A raíz da presentación de todas as sinaturas, o Psoe de Meis non celebrou o pleno que tiña que resolver as alegacións e polo tanto non levou a cabo a aprobación definitiva da ordenanza, polo que este 2024 non haberá subida de impostos.
