Con estas achegas do Plan Extraordinario de Infraestruturas Deportivas ambos concellos realizarán obras para modernizar campos de fútbol municipais
A Deputación de Pontevedra acaba de aprobar dúas axudas axuda do Plan Extraordinario de Infraestruturas Deportivas que ascenden a 98.935 euros para os concellos de Cerdedo-Cotobade e Poio. Mentres que o primeiro sufragará o 100% do orzamento das obras de mellora nas instalacións do campo de fútbol As Estremas, Poio contará con 48.503 € para a reparación dos vestiarios do campo de fútbol da Seca.
No caso de Cerdedo-Cotobade, a obra xorde pola necesidade de modernizar as instalacións deste campo, situado na parroquia de Carballedo, con obras que se levarán a cabo na cantina, nos vestiarios almacén e sala de caldeiras, gradas e no mesmo campo de fútbol, onde se repararán, entre outros, as anclaxes das porterías, o muro de peche, ademais de proceder a instalar papeleiras de reciclaxe e pintar os pechamentos. Por outra banda, instalarase un novo pozo de barrena e executaranse novos alxibes.
Pola súa banda, o concello de Poio poderá modernizar e mellorar esta zona de vestiarios do complexo deportivo da Seca, formada por dous aseos e unha sala de trofeos, que actualmente se atopa en mal estado debido ao efecto das filtracións de auga que se producían a través das gradas que conforman o teito das estancias. Deste xeito aumentarase o número de vestiarios existente, habilitaranse espazos que non se empregan na actualidade debido ao seu mal estado e mellorarase a seguridade e accesibilidade a estas instalacións deportivas. Ademais, estes recursos do Plan Extraordinario de Infraestruturas Deportivas para Poio súmanse aos 51.000 € xa aprobados para a construción do primeiro circuíto de pump track da vila, cos que se completa a contía máxima aprobada pola Deputación para o concello no marco deste plan.
O Plan Extraordinario de Infraestruturas Deportivas está aberto aos 59 concellos da provincia de menos de 50.000 habitantes, que aínda poden solicitar beneficiarse das súas axudas. Ata o momento, o Goberno provincial xa mobilizou preto de 500.000 euros dos 4 millóns de orzamento total, con achegas para Pazos de Borbén, Barro, Redondela, Crecente e Arbo, ademais das de Cerdedo-Cotobade Poio.
