A deputada de Infraestruturas Públicas, Isabel Couselo, inaugurou este mércores a mesa de traballo sobre a Axenda Rural e Urbana da Provincia na que participaron rexedores, concelleiros, técnicos e representantes do tecido asociativo da comarca de Caldas
“Unha das calidades que define a este goberno da Deputación é a súa vocación municipalista. Queremos escoitar as vosas demandas e necesidades para planificar a folla de ruta para o futuro da nosa provincia”, asegurou a deputada provincial
A Deputación de Pontevedra segue a avanzar na Axenda Rural e Urbana da Provincia de Pontevedra (AUPO 2030) e acaba de celebrar a mesa de traballo correspondente á comarca de Caldas, tras pasar xa por Pontevedra, Vigo, O Morrazo e O Deza. A deputada de Infraestruturas Públicas, Mobilidade e Contratación, Isabel Couselo foi a encargada de inaugurar esta xornada na que puxo en valor a aposta da institución provincial para acadar os obxectivos de sustentabilidade recollidos na Axenda 2030 e construír un novo modelo para Pontevedra.
Nun acto no que estiveron presentes rexedores e concelleiros da comarca de Caldas, técnicos e profesionais da administración local e representantes do tecido asociativo desta área, a deputada reiterou a vocación “municipalista” da Deputación. “É fundamental tender pontes a través do debate e do intercambio de visións” porque “todos vós facedes provincia”, remarcou Isabel Couselo. “Por iso poñemos en marcha este amplo proceso participativo, para escoitar as vosas demandas e necesidades e, así, planificar a folla de ruta para o futuro da nosa provincia a través dun proxecto conxunto e compartido”, asegurou a deputada.
A Axenda Rural e Urbana da Provincia de Pontevedra trátase dunha estratexia transversal que recolle os desafíos que debe afrontar a provincia así como as oportunidades que ten para impulsar, deste xeito, un novo modelo de desenvolvemento urbano e rural. O obxectivo principal é converter a Pontevedra nun lugar máis resiliente, inclusivo e seguro, que aposta pola sustentabilidade no económico, social e medioambiental, que coida da súa veciñanza e ofrece servizos de calidade en todo o seu territorio.
