Os nacionalistas anunciaron medidas para repoñer os pasos de peóns eliminados e mellorar a seguridade peonil en varios puntos o concello.
O pasado venres 3 de maio o BNG de Meaño realizou unha xornada de escoita coa veciñanza de Dena na que recolleron as demandas e queixas dos veciños. Na xuntanza fíxose notar o malestar que provoca entre a veciñanza a retirada do paso de peóns de Coirón que pretende eliminar a Xunta. Fai case un ano que comezaron as obras para a súa retirada, impedida naquel entón polos veciños e veciñas da zona. É curioso que, no mesmo venres, a Xunta fixo un segundo intento de rematar a obra reparando a beirarrúa e eliminando a rampa cara ao paso de peóns, o que os veciños de Coirón voltaron impedir.
Os asistentes tamén comentaron a necesidade do paso de peóns que daba acceso seguro ao Centro Social de Dena, lugar frecuentado por maiores e nenos polas múltiples actividades que nel se desenvolven.
Non se entende que sendo Dena un núcleo urbano articulado á beira dunha estrada a Alcaldía teña descoidada como ten a seguridade peonil. O BNG de Meaño consideraque é necesario aumentar a seguridade dos peóns que atravesan a diario a estrada e darlles preferencia sobre os automóbiles, que deben respectar a limitación de velocidade.
A Deputada Montse Prado e a Concelleira Rosana Domínguez anunciaron medidas concretas en materia de mobilidade: defenderán unha moción no Pleno para instar a actuar aos organismos competentes ao mesmo tempo que realizarán unha Iniciativa no Parlamento Galego para repoñer estes pasos de peóns. Por outra banda exixirán que a Alcaldía reaccione e solicitarán crear novos nos puntos onde é necesario, entre outras medidas para mellorar a seguridade peonil e aumentar a mobilidade en todo o concello de Meaño.
O BNG tende a man aos veciños e veciñas para ser unha ferramentaque lles permita ser partícipes das actuacións relevantes para o seu día a día facéndose eco das súas peticións.
