O presidente provincial, Luis Menor, mantivo hoxe unha reunión de traballo na Casa Consistorial de Vilamarín co alcalde, Amador Vázquez, para repasar as diversas liñas de cooperación abertas entre ambas administracións
Un dos temas analizados foi o novo deseño de funcionalidade do Pazo de Vilamarín, no que se está a traballar de xeito coordinado co propio concello, “para dotar de actividades culturais, deportivas e lúdicas a este emblemático edificio”, sinalou o presidente provincial
O presidente da Deputación de Ourense, Luis Menor, visitou hoxe o Concello de Vilamarín onde mantivo unha reunión de traballo co alcalde, Amador Vázquez, para repasar as diversas liñas de cooperación abertas entre ambas administracións.
Neste sentido, cabe destacar que a Deputación de Ourense investirá máis de 750.000 euros no concello ao longo deste mandato a través do Plan CooperOU, “contribuíndo a dar resposta a numerosos proxectos para este territorio”, salientou Luis Menor.
Un dos temas analizados durante o encontro foi o novo deseño de funcionalidade do Pazo de Vilamarín, no que se está a traballar de xeito coordinado co propio concello, “para dotar de actividades culturais, deportivas e lúdicas este emblemático edificio”, sinalou o presidente provincial.
Pola súa parte, o Concello de Vilamarín demandou a colaboración da Deputación para dotar ao municipio dun polideportivo que dea resposta á importante actividade existente no territorio. Tamén solicitou un tractor desbrozadora que lle permita realizar tarefas de prevención de lumes e limpeza de estradas, maquinaria concedida no marco do convenio de colaboración entre a Deputación e a Consellería de Medio Rural.
