A programación do Concello de Redondela co gallo do Día das Letras Galegas comezou hai xa un mes cos contacontos ilustrados sobre Luísa Villalta. As escolas do municipio están a recibir a visita de Polo Correo do Vento “para que os máis pequenos poidan coñecer un chisco á autora homenaxeada este ano dun xeito lúdico a través de contos e debuxos”, explica a alcaldesa Digna Rivas.
Por outra banda o Servizo de Normalización Lingüística repite a experiencia de “Unha semaniña enteira” que tanto éxito tivo nos institutos o pasado mes de abril. Desta volta, co gallo da celebración do Día das Letras Galegas, serán os colexios de primaria os que participen esta iniciativa que anima á rapazada a falar galego as 24 horas, os setes días da semana. A iniciativa comezou onte luns nos centros de Cedeira, Porto Cabeiro, Outeiro das Penas, Reboreda e Alexandre Bóveda. En total son arredor dun milleiro de alumnos e alumnas os que participan no reto. Como na anterior ocasión, desde o Servizo de Normalización Lingüística piden “ a colaboración de toda a comunidade educativa e dos distintos sectores sociais para acompañalos no uso do galego”, lembra Rivas, quen como responsable do departamento salienta que en Redondela “gústanos o galego, e gústanos todos os días do ano”.
O acto institucional co gallo das Letras Galegas será o propio venres, día 17, e contará coa participación de varias alumnas dos colexios de Cedeira, Reboreda e Porto Cabeiro, que será as encargadas de ler textos sobre a figura e obra de Luísa Villalta. Realizarase a tradicional ofrenda floral na estatua de Castelao, e interpretaranse pezas musicais de violín para homenaxear á que fora violinista, escritora e mestra. O acto comezará ás 11.00 horas na Alameda Castelao.
A programación cultural do venres, centrada no Festival Internacional de Títeres, ofrece unha xornada completa de actividades e monicreques en galego. O multiinstrumentista Pulpiño Viascón ofrecerá o concerto “Dallecopé” ás 12.00 e ás 13.30 horas os soportais do Cocnello. A compañía Trécola Porducións porá en escena a obra “Coa música a outra parte” un espectáculo don monicreques de luva na que mesturan diversión e provocación. Será ás 12.30 na Praza da Casa da Torre. Pola tarde haberá unha dobre cita, ás 19.00 horas. Os redondeláns Tanxarita Títeres presentarán a obra “Titiricircus” no Salgueiral, e Teatro ó Cubo propón a peza “De Vilatriste a Vilalegre” na praza do Concello.
A rexedora salienta que Redondela destaca pola súa programación cultural e galega “ao longo de todo o ano”, cunha ampla oferta de teatro, concertos e cine en galego. De feito o próximo mes de xuño proxectarase a multipremiada longametraxe “As bestas” o día 15 e o documental “Os días afogados” o 22. Nos dous casos ás 20.30 no auditorio da Xunqueira.
XXV Aniversario do Concurso Literario “Da Reboraina”
Co gallo da 25ª edición do concurso literario “Da Reboraina”, que organiza o CEIP Reboreda, o Concello de Redondela edita un libro conmemorativo coas obras premiadas nestes 25 anos. A presentación farase na véspera das Letras Galegas, o xoves día 16, no propio centro escolar. Desde o SNL explican que este libro é unha edición facsímile “que reproduce os textos orixinais, coa caligrafía dos nenos e nenas que son os protagonistas deste concurso literario”.
