Realizáronse labores de roza e acondicionado de viais así como a habilitación de zonas de estacionamento
O alcalde do Concello da Lama, David Carrera, puxo en marcha cos operarios municipais da Brigada de Obras e Servizos un amplo dispositivo de roza e limpeza nas estradas de acceso e no entorno da igrexa de Xende coa intención de ter toda a zona preparada para acoller a romaría do Santo Cristo que terá lugar durante esta fin de semana do 25 e 26 de maio.
Así, nestes días tanto medios materiais como humanos do Concello e mesmo da Deputación están levando a cabo labores de limpeza, roza e acondicionamento dos viais por onde discurrirá este evento turístico-relixioso así como das principais estradas de acceso á parroquia de Xende co fin de facilitar ademais do tránsito zonas de estacionamento ante a previsible chegada masiva de visitantes e romeiros.
Na tarde de hoxe, ás 20 horas, comezaron as Novenas que dan comezo ás celebracións relixiosas e que provocan unha gran afluencia de persoas e familias que percorreron os distintos viais que conducen ao Santuario do Santo Cristo de Xende (A Lama).
PROGRAMA FESTIVO E RELIXIOSO
Os actos relixiosos propiamente ditos da Romaría do Santo Cristo de Xende darán comezo o sábado 25 de maio con misas ás 10:30 horas e ás 11:30 horas da mañá. Ás 12:30 horas terá lugar a misa solemne seguida de procesión. Pola tarde haberá misas ás 17:30 horas e ás 18:30 horas.
Por outra banda, ás 21 horas haberá unha gran churrascada e postres caseiros. Ao remate sortearase a becerra das rifas. A partir das 23 horas terá lugar a verbena amenizada por Son das Tabernas, Trío Azabache e o Dj Milucho.
A xornada do domingo prevé a celebración de misas ás 10 e ás 11 mentras que a solemne será ás 12 do mediodía. Ao remate da misa terá lugar a tradicional procesión que contará co acompañamento da Banda de Música Unión Musical de Tenorio.
Ao rematar a procesión haberá un concerto protagonizado pola Banda de Música Unión Musical de Tenorio. Ás 19 horas haberá tamén unha misa solemne e a continuación procesión coa gloriosa imaxe do Santo Cristo da Agonía de Xende.
Os actos relixiosos pecharán o domingo 2 de xuño ás 12:30 horas cunha misa solemne de Corpus e a continuación procesión do Santísimo Sacramento.