Os nacionalistas denuncian de novo as trabas que a Alcaldía pon á labor da oposición.
O vindeiro mércores 5 de Xuño hai pleno no concello de Meaño, iso si, convocado de xeito extraordinario, igual que o do pasado mes de abril, e sen haber un ordinario dende Novembro. O BNG chama a responsabilidade do goberno, de volver convocar os plenos de xeito ordinario, o último xoves de cada 2 meses como se acordou no Pleno de Constitución, para garantizar a transparencia, o correcto funcionamento da xestión municipal, e tamén permitir que a oposición poida facer o seu traballo, en definitiva, o BNG de Meaño demanda que o Pleno funcione con normalidade democrática.
Neste pleno, con 11 puntos na orde do día, a formación nacionalista defenderá dúas mocións que confían que saian adiante co apoio das demais formacións políticas do consistorio.
A primeira para a mellora da seguridade peonil no concello, onde se tratan puntos concretos como moderar a velocidade en certas zonas das travesías máis concorridas por viandantes, mellorar a visibilidade ou repoñer pasos de peóns eliminados, como o de Coirón, onde o BNG lle esixe á Xunta que se repoña de xeito urxente. Fai unhas semanas envióuselle un escrito á Xunta respaldado coas sinaturas d@s veciñ@s afectad@s solicitando unha reunión ca formación e cos veciños, e esta ficou sen resposta.
A segunda das mocións que defenderán no pleno ten a ver cos verquidos no río de augas contaminadas, na que o BNG espera chegar a un acordo plenario unánime para dar unha solución eficaz e rápida.
O Bloque Nacionalista Galego convida a todos os veciños de Meaño a asistir a este pleno no que se tratarán puntos de moita importancia para a veciñanza, e espera que a partir deste pleno, se retome a periocidade establecida dos plenos ordinarios.
