Apenas vinte días despois da última edición do certame da Canción Mariñeira, a Casa da Cultura de Neda acolle esta fin de semana un Festival de Rondallas, organizado polo Centro cultural recreativo e deportivo El Puntal e máis pola Rondalla Añoranzas.
O cartel desta cita musical, prevista para o sábado 27, a partir das 19 horas, inclúe nada menos que a actuación de tres destes tradicionais conxuntos musicais, procedentes de distintos puntos de Ferrolterra e do Ortegal.
Así, o público que asista ao encontro poderá desfrutar das interpretacións da Rondalla de Cariño, que este ano celebra o seu trinta aniversario; as da citada Añoranzas, decana das rondallas ferrolás (1983) e, como non, as da nedense Lucero del Alba, agrupación cuxa historia se remonta a mediados do anos sesenta.
O festival, que constitúe unha nova oportunidade para pór en valor o patrimonio da música popular, é totalmente de balde e conta coa colaboración do Concello de Neda e da Deputación da Coruña.
