O proceso para a presentación de ofertas rematará o vindeiro 11 de xullo e contará con un importe para levar a cabo este proxecto de máis de 159 mil euros.
Dende o Goberno Local agardan que comecen os traballos na Praza da Aldea pasado o verán. Un proxecto que se está tramitando xunto con outros traballos co fin de crear núcleos de centralidade nos diferentes barrios do concello como é o caso do proxecto da Carreira dos bolos da Pedreira.
O obxectivo desta actuación, segundo lembrou nesta xornada o alcalde, Manu Lourenzo, é poñer en valor o espazo dun dos barrios históricos do concello, ao tempo que se aposta por un modelo “coidado, moderno, agradable, accesible e respectuoso coa esencia do barrio”.
A reforma suporá a creación dun núcleo de centralidade no barrio, poñendo en valor todo o conxunto arquitectónico formado polos muros de mampostería, cruceiros, edificacións e outros elementos que xa forman parte da Praza da Aldea, respectando a esencia que o caracteriza.
Así, consistirá na pavimentación con pedra do país de toda a praza. Ademais, levarase a cabo o arranxo do acceso á praza con pedra e formigón, e dotarase toda a zona con mobiliario urbano, como aparcadoiros, bancos e árbores, que farán da Praza da Aldea un espazo agradable.
Uns traballos que comezarán en canto pase o verán, contarán con 4 meses de prazo de execución e cun investimento de máis de 159 mil euros.
Manu Lourenzo dixo que “con este proxecto trátase de poñer en valor e potenciar o Patrimonio Natural e paisaxístico do noso concello. Trátase de deixar de entender Soutomaior como unha rede de estradas sen espazos para as persoas e de tornar materiais como o piche por materiais nobres como a pedra, a madeira ou o aceiro. E así, deste xeito, recuperar espazos de convivencia da veciñanza e poder volver ver aos nenos xogar na rúa”.