- Os Xardíns da Xiralda acolleron a lectura do manifesto a cargo da alcaldesa
- Manualidades, xogos, espectáculos, desfile, karaoke e proxeccións
O Concello de Ponteareas reivindicou o seu compromiso coa diversidade cunha xornada cargada de actividades. Os Xardíns da Xiralda acolleron obradoiros, desfile, karaoke, cine e a lectura do manifesto a cargo da alcaldesa de Ponteareas, Nava Castro.
O Concello de Ponteareas de Ponteareas comprométese co impulso de políticas de diversidade encamiñadas á loita contra a LGBTIfobia e “fomentar así que todas as persoas poidan vivir unha vida sen medos, en liberdade e sen armarios”, así o traslada a alcaldesa, Nava Castro, na lectura do manifesto con motivo do Día Internacional contra la LGTBIfobia que este ano se celebrou baixo o lema “Educación, dereitos e paz: Orgullo que transforma”.
A alcaldesa adiantou o compromiso do seu goberno a promocionar accións encamiñadas a sensibilizar contra as múltiples discriminacións que sofren as persoas trans e polo recoñecemento de que as persoas non binarias e intersexuais tamén existen. A Concelleira de Benestar Social, Raquel Plana, salienta a alta participación da cidadanía nas distintas actividades celebradas dende as dez e media da mañá ata as doce da noite.
Obradoiros de manualidades, de xogos e de caracterización e maquillaxe; actuación de Humberto Longueira con “Rianxeira”, desfile, karaoke e proxección da película “A moza danesa” son algunhas das actividades que tiveron lugar.
Raquel Plana quere agradecer o traballo do persoal do seu departamento e a colaboración de Humberto Longueira no deseño da programación que promoveu a visibilización e sensibilización a través de actividades compartidas e nas que puideron participar todos os públicos. “Visibilizar e compartir e fundamental para normalizar. Todos somos responsables porque todos formamos parte da sociedade por iso o noso obxectivo era deseñar un programa entretido e coa capacidade de xerar conciencia e momentos grupais nos que interactuar porque unha sociedade máis xusta é cousa de todas e todos”.
