- Asiste en Santiago á primeira asemblea da nova federación europea de asociacións xacobeas Camino Europa Compostela que representa unha vintena de países
- Destaca que o momento de “gran vitalidade” da ruta xacobea, cun incremento no número de Compostelas do 16%, incita a reforzar a coordinación efectiva
O director de Turismo de Galicia, Xosé Merelles, salientou hoxe o papel estratéxico e clave que historicamente tivo o asociacionismo xacobeo e reivindicou a súa importancia actual para o futuro do Camiño de Santiago. Así o manifestou durante a asemblea da nova federación europea de asociacións xacobeas Camino Europa Compostela, que se celebra en Santiago de Compostela, e que representa a máis dun cento de asociacións de preto dunha vintena de países.
O director de Turismo fixo un chamamento a “unha coordinación efectiva entre todas as institucións e organizacións que protexemos, xestionamos, difundimos e atendemos aos peregrinos xacobeos” neste momento de “gran vitalidade” da ruta xacobea na que o número de Compostelas está a medrar a un ritmo do 16% e máis de 60% dos peregrinos son estranxeiros”
Neste sentido, Xosé Merelles destacou a necesidade traballar en aspectos do Camiño coma a sustentabilidade patrimonial, ambiental e socio-económica; a protección especial aos grandes itinerarios históricos; a defensa dos bens culturais tanxibles e intanxibles con especial relevancia aos valores xacobeos da hospitalidade e acollida; a transcendencia persoal no Camiño, e o camiño como difusor dos valores europeos que preconizan o Consello de Europa e a Unión Europea, e finalmente, a necesidade de unir os roteiros de peregrinación para xerar unha rede transitable, con todos os servizos necesarios para garantir unha peregrinación segura, austera e axustada ao espírito da peregrinación.
Semana transcendental para o Camiño
O director de Turismo de Galicia anunciou que esta semana está a ser transcendental para o mundo xacobeo, xa que tras a presentación desta entidade, asinarase un acordo entre outra federación que representa a administracións públicas de Europa coa que representa á sociedade civil europea.
Ademais, o día 5 de xullo, esta federación converterase en operadora ante o Consello de Europa do primeiro itinerario cultural europeo. “Imos camiñar xuntos -por decisión propia- para garantir un Camiño aberto, de todos e para todos, protexido, sostible, inclusivo e respectuoso co espírito da peregrinación”, afirmou.
