O alcalde dá a benvida a nova veciñanza e agradece a confianza depositada no Concello de Covelo
Os últimos datos do censo de poboación de Covelo abren a porta á esperanza despois de anos cun modelo de pirámide de poboación regresiva. Segundo informa o alcalde, Pablo Castillo, nos cinco primeiros meses de ano gañáronse 87 novas veciñas e veciños dos que catro foron nacementos.
Nunha vila con 2.561 habitantes estes datos son ben recibidos e amortiguan as cifras de defunción e a perda de poboación. Unha boa oferta de servizos públicos e a procura dunha vida saudable poden ser as causas deste incremento poboacional. O Concello de Covelo conta con escola infantil gratuíta, un colexio de infantil e primaria, biblioteca pública, piscina e pavillón municipal, centro de saúde, servizo de atención temperá, pistas deportivas nas doce parroquias, residencia de maiores e servizo de autobús que conecta coa principal cidade da área metropolitana tres veces ao día. A estes servizos súmaselle os importantes apoios que o Concello ofrece en formación e programas de inserción laboral impartidos sen saír da vila. Ademais, cabe salientar os múltiples convenios con diferentes entidades para promover o coidado da saúde mental e a adquisición de coñecementos a calquera idade. A esta oferta hai que engadirlle as clases de ximnasia gratuítas, os cursos de natación e os campamentos de verán e de nadal para facilitar a conciliación familiar e laboral ou as axudas a nacementos.
Neste último verán os aloxamentos de turismo acadaron as mellores cifras e acolleron visitantes de toda a xeografía española que apostaban polo contacto coa natureza, algo que en Covelo está garantido atopando sendeiros e rutas de montaña pero tamén de río e praias fluviais, boa gastronomía, unha ampla oferta de aloxamentos que van dende hoteis a quintas, cámping ou vivendas turísticas para adaptarse a todo tipo de perfís.
O alcalde, Pablo Castillo, quere dar a benvida á nova veciñanza e agradece a confianza depositada en Covelo, “a elección do lugar onde un quere desenvolver a súa vida é unha das decisións máis importantes da vida por este motivo estamos moi agradecidos de que aposten por Covelo e pola nosa parte seguiremos traballando para mellorar e ampliar os espazos e servizos públicos”.