A actividade, que alternará narración, ilustración e música, chegará tamén neste mes de xullo a Ponte Caldelas, O Rosal, Gondomar, Moraña, Salceda, Meaño, Ribadumia, Pontecesures, Mos, Portas, Catoira e Forcarei
A Deputación continúa esta semana levando polos concellos da provincia “Tinta do mar: pequena biografía de Luísa Villalta”, un contacontos para festexar as Letras Galegas e divulgar a traxectoria da autora homenaxeada neste 2024. En concreto, e despois de visitar Baiona, O Porriño e Vila de Cruces a pasada semana, este venres 12 de xullo chega a Mondariz-Balneario, ás 20:00 horas na parte traseira da Casa do Concello.
Polo Correo do Vento será o encargado de executar este contacontos ilustrado en Mondariz-Balneario que consistirá, por unha banda, na narración da vida de Luísa Villalta e na creación dunha ilustración sobre a autora. Ademais, abrangue a interpretación de distintas pezas musicais e pecharase cun pequeno coloquio adaptado á idade da rapazada participante. Completarase a sesión cun obradoiro no que cada asistente realizará a súa propia caricatura de Villalta.
Tralo seu paso por Mondariz-Balneario, “Tinta do mar: pequena biografía de Luísa Villalta” continuará percorrendo a provincia e chegará o 15 de xullo a Ponte Caldelas; o 16 de xullo a O Rosal e Gondomar; o 17 de xullo a Moraña e Salceda de Caselas; o 22 de xullo a Meaño e Ribadumia; o 23 de xullo a Pontecesures; o 26 de xullo a Mos, así como tamén a Portas, Catoira e Forcarei (nestes últimos tres concellos pendentes de asignar data).
A Real Academia Galega (RAG) dedicoulle o Día das Letra Galegas 2024 á escritora, filóloga e violinista galega Luísa Villalta. Escribiu poesía, teatro, narrativa de ficción, ensaio, artigos xornalísticos e traducións, e a RAG destaca dela que foi “creadora dunha obra singular e sólida que a converteu nunha das grandes figuras da literatura galega que emerxeron na segunda metade dos anos 80 e primeiros 90”.
